войти кнопки соц.сетей
13 сентября 2017 в 08:43

Град йӧрса артистка

Неыджыд сикт. Пелькиник лабич. Аддзысьӧны том йӧз.

- Видза олан, Клавук, муса нылукӧй менам!

- И тэ видза олан, Колюк! Дерт, аттьӧ, мый аслад нылукӧн шуин, но ме ӧні абу нин тэнад.

- Эг вежӧрт...

- А мый тані гӧгӧрвотӧмыс. Ме ӧні, Колюк, народнӧй.

- Бара эг гӧгӧрво.

- Пондін сэні: эг гӧгӧрво да эг гӧгӧрво! Ме ӧні народнӧй... артистка. Тэ ӧд тӧдан, мый ме важысянь нин артисткаӧн лоны окотиті. Со и лои, да нӧшта пыр жӧ - народнӧйӧн!

- Но кыдзи нӧ сідзи?

- А вот тай: ветлі карӧ, автовокзал дорын закажиті аслым «корочка», сэні жӧ менӧ фотографируйтісны, а мӧдысь ветлігӧн мынтыси, и со тэныд! Но, ӧні, чайта, гӧгӧрвоин жӧ?

- Ӧні да. Петкӧдлан?

- На, видзӧд, колӧкӧ!

- Та-а-ак, - лыддьӧ. - У-до-сто-ве-рение. Та-а-ак. Народная артистка Риссии... Риссияыс сійӧ кӧні, Китайын али мый?

- Да сорсьыштӧмаӧсь, Колюк. Но ӧд позьӧ вежны. Лӧсьыдика...

- Лӧсьыдика, шуан? - лыддьӧ водзӧ. - Народная артистка Риссии Пулькина Клавдия Владимировна. Клавук, но тэ ӧд Васильевна!

- Да абу ӧмӧй веськодь, кутшӧм вич. И тайӧс позяс вежыштны.

- Лӧсьыдика?

- Ага, лӧсьыд-ик-а... Зато фотоыс менам!

- Фотоыс да. И уна-ӧ мынтін?

- Вит...

- Мый вит?

- Сюрс!

- Таысь? Вит сюрс!

- Зато ме ӧні артистка. Народнӧй.

- Ой-ой. Татшӧм «корочкаӧн»?.. Клавук! Да тэ кышӧдсӧ видзӧдлы?

- Ну, видзӧда - зарни шыпасъясӧн: «УДОСТОВЕРЕНИЕ».

- А водзӧ... Улысьджык лыддьы!

- НКВД...

- Но тэ и... збыльысь артистка. Тешитчыштӧмаӧсь тэ вылын. Аслад жӧ сьӧм вылӧ.

- Ха! Тані ставыс правильнӧ: НКВД - сідзкӧ, Народнӧй Клавдия Вла... Димировна!

- Васильевна жӧ... А со тадзи бурджык на лоӧ: Народнӧй Клавдия Васильевна - дьӧбӧ!

- Ыыыыы! Коля-я-я, ы-ы-ы-ылӧдлісны!..

Дзигӧдӧ да окыштӧ:

- Эк тэ, артистка... огороднӧй. Да эн сэсся бӧрд!..

Олег ПРЯНЕЧНИКОВ.

Вылыс Салда кар.

"Чушканзі" журнал

Яндекс.Метрика Рейтинг@Mail.ru